Yé la...yé rivé
Dipi nanni nannan
Li ka antann
Jou li ké pouvé palé.
I briga, i pran lajòl
Mé annyen pa fè li kawka.
Yé té lé fè li djokoti
Yé té lé fè li fronmen so bouch.
Mè jòdla so tour rivé.
Yé toujou di:
“Tout tanbou pouvé chanjé ti bwa”
“Ké pasyans to ka fè grenn kalbas antré a tchou moustik”
A pa mo ki di.
“Karenm diré san tan, jou di Pak li fini.”
Jòdla i trapé roun konpanyen ki ké pouvé bay li lanmen .
Yé ké briga pou Lagwiyann vansé.
Pa alé siré ban lasanblé.
Pa fè yé di :
“Palò dimanch a pa palò lendi.”
A pou zòt montré moun Lagwiyann ki yé pa briga pou annyen.
A pa pou moun di :“Bal fini,vyolon annan sak”
Nou voyé zòt alé
Pou zòt kriyé annan ki lanmizèr nou ka roulé.
Pou zòt louvri wéy dirijan lafrans
Menm ké roun takari kannon-an pa lé vansé.
Di sa , ké wè sa,
a dé bagaj diféran.
Di Makourya jouk Irakoubo, Matoury,
Rémire Montjoly ké ròt koté pli lwen
Yé briga kot a kot pou zòt .
Pa konté soumaké annan pòch,
lavenir lagwiyann pandriyé asou zòt do.
Zòt pa gen roun “baguette magique”
Zòt pa “le père Noël”
Zòt pa béf, zòt ké fè sa zòt pouvé.
Pa lésé moun di :
Awa, Awa!
Ké toujou gen mal parlan
Ké toujou gen moun ké kritiké zòt mannyè briga
Ké toujou gen radyo djòl
“Jalouzi a frè sòrsyé.”
Pa gadé pou sa.
Mè pa lésé yé fouté pa mal di nou djòl ròtbò-a .
Nou gon ké sa.
Fè sa zòt divèt fè