Sézon lapli

Men sézon lapli rivé
Dipi bonmanten, lapli ka tonbé" chwa-a, chwa-a."
Li ka charyé tousa li trapé asou so chimen.
Détan li ka tonbé “floup”
Nou pa menm ka gen tan wè koté li pasé.
Lò van ka vanté,
to ka tandé"plèkètèk,plèkètèk"
Tòl ka voltijé alé vini.
Tout bagaj ka pran lanvòl “tchalanm” kou makak ka monté pyébwa.
Rounlo moun ka rélé “anmwé”.
Gran moun-yan ka asiz “boudoum”
Yé ka mété yé lanmen asou yé tèt.
Oun ròtlo ka tonbé “bligidip”,
yé ka rélé “woy” !
Yé ka pran yé pagra, yé ka ralé li ’’ tchap"
Yé ka mété kouri atè.
Yé ka sasé kouman yé ké pouvé soti annan sa “lélékou-a”.
Yé ka èspéré ki pèrdan ké bay yé roun chans sové déztrwa : kannari, lélé , goligo..
Yé ka pran tousa yé pouvé mété annan yé panyen.
Yé pa gen tan “sigalé”
Ti moun-yan ka pran yé plézi.
Menm si tan-an maré, yé ka “tchouboum”
annan dilo larivyèr-a.
Yé ka plonjé “tchou pou tèt”, yé"fouben"
yé pa mélé ké sa.
Yé pa ka sonjé tout malò lapli-a ka lésé dèyè so do.
Pi ta, pi tris 😩😩😩