Senloran

Senloran, di nou sa ka pasé?
Senloran, di nou kisa ka rivé to?
Ki mové van ki ka souflé?
Yé ka tchwé
Yé ka vòlò
Noukonpanyen,
Nou fanmi-yé ,
Nou zanmi-yé.
Antan lontan nou pa té jen konnèt tousa.
Banyar rivé
Migran pasé.
Nou pa pran yé pou félaga.
A yé dèsten ki fè yé la.
Nou louvri bra.
Nou pa bay yé bwa.
Nou pa bay yé mépri.
Jòdla a nou ki an kaka kòk.
Pa lésé yé di
ki nou modi.
Kolonizé nou tout savé
A bay lavwa
sèl nou pouvé.
Koté lalwa pou yé mété
lòrd ké lapè.
Moun ka rélé anmwé.
Pitit ka pléré.
Granmoun ka mouri.
Pa bésé bra
Nou pa modi. Oun jou prochen,
Ansanm,
ansanm nou ké rivé,
soti an benyenyen jòdla nou yé.