Senloran, lò mo té piti

Kouté sa gran moun -yan té ka di.
Kouté sa mo menm té konnèt.
SENLORAN até roun ti Paris.
Mo pa savé si até oun bèl palò.
Si yé palò até vérité.
Oroyo !
Yé toujou di nou a pou kouté granmoun.
Lò mo té piti,
Tout lari té toujou nèt.
Moun -yan pa té ka jité yé briyé a lari.
Tout batiman ladministrasyon -yan té jòlòt.
Lanméri , Lapréfèktir…
Ladwan.. nou ti Légliz, menm lékòl - ya té jòlòt.
A pa pou vanté mo koté.
Mé i té ganmé toubonnman.
Nou té jik gen oun Trézor piblik.
Até bon lavi.
Nou pa té gen vòlèr kou jòdla.
Mo tandé i té gen oun nèg “DCHIMBO”

ki té ka simen oun mové van.
Yé fini par koupé so tèt.
Ye di ki so tèt té mizé Kayenn.
Yé té ka tandé li kriyé :

“souplé bay mo mo tèt”
Mé… até lò djab té ti gason.
Mo krè até tan lèsklavaj ?
Lò mo té piti Senloran.
Mo wè déztrwa banyar ki pa té routournen a yé koté.
Nou té ka kontré ké yé annan lari, nou pa té pè yé , mé listwè yé lavi pa divèt té bèl.
Mo pa krè i té miyò pou yé Senloran
Alé savé ?
Chak moun gen so dèsten.
A lavi-a ki konran.