Nwèl ka rivé

Nou ja ka santi so lodò.
Dipi soukou tonbé, to ka tandé chanté nwèl andan tout kwen lagwiyann.
Tout magazen plen kou oun dizé.
Andan lari, moun yan kou fronmi fou.
Toupatou ka fè cho,
yé benzwen trapé déztrwa joujou pou yé pitit.
Mé lapli ka kontinyen fè so zafè,
i ka tonbé “chwa, chwa…’
Moun-yan pa mélé ké sa.
Pa bliyé, yé té di nou :
" Nou pa gen papa Nwèl “😁
A débrouya pou yé fè.
Déztrwa manman pitit ké jité oun wéy asou joujou
koté ròt timoun -yan ja pasé lanmen.
Mé ounlo, ka sasé lanouvoté.
Yé pa gen bokou soumaké
mé a pou yé swiv lakadans.
A pou yé fè kou blanng-yan.
Fwa gra, langous, zwit chanpangn…
ké pété sèk
Kochon rousi ké ariko rouj,
bouden ké ti paté
pa gen lavwa.
Oroyo !
“Tan fè tan, tan lésé tan”
Mé ! A pa pou yé bliyé;
“Ti poul té lé swiv ti kanna li mouri néyé”
“Imité ka détenn”
A pou yé sonjé
Kannaval ka rivé dèyè, yé ké benzwen soumaké.
Mé yé pa ka gadé pousa.
Pa ka fè anyen, dimen a oun ròt jou.
Chanpangn ouben tèt maré.
Ýé ké bay lavwa kantmenm.
Bon Nwèl