Mo bèl ti koté

Jòdla mo ka ramé
Jòdla mo ka trimé
Jòdla tout moun ka voyé labou.
Jòdla tout moun ka palé mo mal.
Mé pa bliyé i gen oun tan,
a mo ki té pli bèl ti koté Lagwiyann.
Lavi-a ka tchòlòlò mo.
Lavi-a ka malmennen mo.
Mé mo ké rivé janbé sa pòlòlòk-a ki anlè mo chimen
Bondjé gran.
Bondjé la ké mo.
Mo la, mo pòkò mouri
Zòt ka di :
“Mo zafè mal,
mo gen ounlo djopopo”.
Mo ké djoubaté.
Mo ké briga.
Mo ké soti andan sa benyenyen-an.
Mo la, mo pòkò mouri
Larout-a ké lonng.
Larout-a ké rèd.
Mo konnèt janbé so.
Mo konnèt pran bistouri.
Zòt pouvé fè : “oro”
Zòt pouvé di :“awa”
Mo la mo pòkò mouri.
A pa jandarm gran sab,
A pa jandarm ti baton,
A mo moun-yan ounso ki pouvé tiré mo la.
A pou yé bay yé kò oun balan.
A pou yé fè débrouya.
Yé pa gen tan dansé ladja.
Yé pa gen tan bwè kachiri.
A ansanm ansanm yé ké rivé.
Paské mo la, mo pòkò mouri..