Mèr

Mèr ! Oun mo ki pa gen roro.
Lò to Mèr, to ka gen
Oun lo charj asou to do.
Oun lo problènm annan to tèt.
Andan sa travay-a to pa ka ganyen pyès lònò.
Mé to savé a pou péy-a to ka djoubaté.
Pa gadé dèyè, a vansé pou to vansé.
Mèr! (Maire) !
A jalouzi, mépri,
djopopo ounso to ka rékolté.
Déztrwa moun ka rayi to.
Mé “A pa tout danbwa ki rayi agouti.”
Oun ran moun ké di :
“rayi chyen mé pa di so dan nwè.”
En! En!
Nou toujou ké tandé malparlan voyé labou.
Nou tout savé ki jalouzi a frè sòrsyé.
Yé ka di : " Sa tourt di laro bwa, a pa sa li di anba trap".
Oun ròt ran ka di : " palò an bouch pa charj "
Mo menm ka di : " kolibri ka senyen disan li gen."
“Piti, piti tòti ka monté montangn”
Chak moun, chak moun.
Lakritik a manjé lavi-a.
Chak moun lib kritiké.
Kou blanng-yan ka di : ‘‘kritiké fasil, a fè travay-a ki gen mordan"
Mé mo pouvé di zòt ki pou to rété Mèr jòdla, a pou to konnèt monté oun pyé wara.
Oun lo moun ja tandé palé di so.
Mé pa gen bokou ki pouvé manyen oun takari pou janbé li.
“A pa loutou di kaka kou chyen , a tranblé janm-an ki tout”