Lespwar mal papay

Bèl ti manmzèl,
I gen oun dolo ka di :
“A kouto ounso ki savé sa ki annan tchò yanm.”
Jòdla mo lé louvri mo tchò pou to.
Lò mo ka wè to pasé,
mo tchò ka désann a mo pyé.
Mo lanng ka vini lou,
yé té ké di mo gen oun patat cho a mo bouch.
Mo dé janm ka tranblé kou oun fèy papyé van ka vanté.

Mo té krè mo té ardi mé…
“A pa tou di kaka kou chyen, a tranblé janm ki tout”
To toujou byen ganmé ké to lachat asou to tèt.
To kanmza maré rèd a to ren.
Bèl ti manmzèl mo anvi kontré ké to.
Mo anvi fè oun ti kozman ké to,
pou mo wè si nou chokola ké pouvé lélé.

To dwèt ka di :
Mé bèl boniman mouché-a gen.!

“Bèl ti manmzèl mo pran djèp asou to.”

Mé répons manmzèl :
“Cher Monsieur, je ne suis pas libre.
Il vaudrait mieux aller voir ailleurs.”

Ké sa bèl ‘‘prestance" to gen a to kò,
To bay mo oun kout fransé.
Mo rousouvrè oun bèl bikok a mo tèt.
Pa fè anyen mo fanm, mo ké kontinyen
rensé mo wey asou to.
“Maléré pa gen gro tchò.”