Lanmou Granmoun

Lanmou pa gen laj.
Lanmou pa gen vizaj.
Jenn kou vyé,
dépi oun wonm wè oun bèl fanm pasé,
So disan ka monté a so tèt.
So tchò ka fè “bidibap”.
So wéy ka kléré kou oun soukouyanyan.
Détan wonm-an ja gen oun laj avansé
Misyé ka djèp asou manmzèl.
Pa pran li pou oun dousinè.
Pa pran li pou oun makoumè.
Menm si so janm kou dé manch pilon.
A pa oun nèg Co-Mombo.
Menm si so vizaj kou oun mari-tanbou tro mi.
Misyé djòk toujou.
“Tig vyé mé so zonng pa vyé”
I pa ké pwé dansé kaladya,
Mé pou kasé tibwa a so zorè,
i ké pwé janbé oun “so” san takari.
So pagra pa gen grenn lò.
I pa ké pwé bay li kolyé chou.
I pa ké pwé bay li pandorè.
Mé i ké pwé bay li lanmou.
“Lanmou fré, yanm plen Kwi.”