Kannaval rivé

Kannaval rivé, mo kou oun poul ki gen oun dizé pri a so gogo.
Mo ka rété sonjé.
Kouman mo ké fè pou rivé jouk divan lapòt Nana?
Kouman mo ké fè pou djap oun kavalyé ?
Laj-a monté rot.
Menm si chivé blan-yan kaché,
A oun ratélyé ki a mo bouch.
A pa pou mo palé tro bokou pou li pa tonbé.
Ren-an vini tibi rèd.
Lò mo ké voyé li a goch, i ké pati a drèt.
Kavalyé-a ké vini fou
I ké di: " mo manman latò ! Mo tonbé asou oun touloulou vijil, ouben oun touloulou lakrèch ?
Manmzèl ké tchwé mo !"
Asa menm ki rivé.
Kavalyé-a té maré toubonnman.
I rété sonjé.
“Kouman mo ké fè pou manmzèl laché mo ?
Mo andan oun djopopo!”
Misyé di mo:
“Souplé touloulou mo lasé soulyé détaché, bay mo oun ti chans pou mo maré li.”
Mo laché misyé blip, mo tournen mo do pou li.
Mo té ronté “kou oun aïra poul pran”
Mo fofilé mo kò andan sal bal-a,
Mo pran “la poudre d’escampette “, mo disparèt.
Kavalyé-a divèt di :
“Oroyo ! Manmzèl biské ?
Ay manman ! Mo ké profité maron.”