Bèl réséda

Fanm mo kontan to.
To ka konté ounlo pou mo.
Nou pa jen kontré,
mé dépi déztrwa jou mo ka zwété to.
Mo djèp asou to.
Dépi mo ka wè to pasé divan mo lafinèt,
mo tchò ka fè “bidimbap”.
Mo disan ka monté a mo tèt.
Mo anvi fala to.
To ké di : “mo gen kran !”
Mo vizaj pa ka sanblé oun lalin plenn .
Blanng-an ka di :
“L’habit ne fait pas le moine.”
Pitèt yé gen rézon ?
Oroyo !
Mé to konnèt nou dolo :
“Tig vyé mé so zonng pa vyé”.
A mo toubonman !
Mo savé ki “palò an bouch pa chaj”.
Oun ran moun ka di : “palò a van”.
Pa pran mo pou oun baroufyè, mo pa oun Michèl Morin mé mo sa oun bon boug.
Fanm mo louvri mo tchò pou to.
Mo ké fè débrouya pou nou kontré.
Si oun jou “Bondjé béni bakòv”, nou ké rivé kontré pou nou fè oun ti kozman