Bèl doudou

Lò mo ka wè to pasé tou lébonmanten, byen ganmen ké to joli gòl fléri, ké to panyen a to bra,
Bèl flèr fré kou larozé,
mo tchò ka fè “bidimpap” kou oun zabapen tro mi ki ka tonbé.
Mo kontan to, kou mouch myèl kontan siro.
A pou nou kontré pou nou boukanté palò.
Pou mo kasé tibwa a to zorè.
Mo janm kou baton lélé .
Pa gadé pou sa!
Mo vayan toubonman!
Mo pwé fè oun kours kouri pou fala to.
To ké pwé konté asou mo, mo sa oun vré karyakou.
Mo pa ka promèt to vini ké ounlo kado.
Mo pagra plen ké lanmou.
Mo ka fè débrouya pou kontré ké to.
Pa pran mo pou oun dousinè.
Mo savé “chans zwa a pa chans kanna” mé lanmou pa gen vizaj.
“Lanmou fré, yanm plen kwi.”
A pou nou gen tan fè oun bout chimen ansanm.
A pou nou gen tan pran oun bon lakal annan dilo lavi-a.
Ké lanmou nou ké janbé tout pòlòlòk nou ké trapé divan nou.
Mo trapé djèp asou to, to annan mo tèt, mo tchò, tout mo kò.
Mo kontan to toubonnman fanm , mo bèl doudou.