Bèl doudou (suite)
Mé bèl palò!
Mo manké toudi, mo rété èstébékwé.
To pa oun dousinè.
To pa ka fè “djendjen”.
To ardi toubonnman.
To lanng pa a to pòch.
Lésé mo di to:
Makak té lé monté roun pyé wara.
Li té krè : a ti afè!
Lò pikan pri a so latcho, li bay désann tchou pou tèt.
Li gadé grap wara pandriyé laro so tèt.
Misyé di: " Awa! Mo ké atann yé mi ,yé ké tonbé a mo pyé."
To wè?
“Palò an bouch pa charj”
To pouvé fè oun kours kouri ?
Oroyo!
Blanng-yan toujou di:
" l’habit ne fait pas le moine."
Mé: " Lapousyè di pasé sa, van charyé’l kanmenm"
Mo pa ka achté chat dan sak.
A pou nou kontré pou nou boukanté palò.
Mo pa lé biské to.
Anvan nou pran oun lakal andan lavi-a,
a pou nou wè si nou chokola pa ké fè kras.
I gen oun dolo ka di:" dousman bon, vitman bon osi".
Mo memn ka di " dousman miyò."
“A ké pasyans léfan déboché takoko.”
Atò oun sèl répons mo pwé bay to:
“Asou kouri nou wa wè.”