A sa ki 'lanmou' ?
Lavi-a té bèl
Soley té ka chofé rèd.
Asiz anba pyé mango-a
Yé té kou dé zozo
voplé annan pay koko.
Yé tchò té kontan
Yé té byen toubonnman
Yé pa té ka sonjé pou dimen.
Yé pa té ka sonjé ki lanmou a kou lavi
i pouvé pati san tanbou san tronpèt
Yé té bliyé ki lanmou
a pa roun bol toloman
I pouvé pati “babap”
I pouvé glisé “floup”
san briga san rourounou …
Manmzèl rété estébékwé.
A kou roun bikok li rousouvrè an plen tèt.
Li pa rélé “way”
Li pa tonbé “bligidip”
Li di : Mo manman latò
A koté mo té fika ?
Gadé sa ka rivé mo !
Li rété sonjé vayan dolo kréyòl
nou gangan fèt pou wonm-yan.
“Lò chat pa fen , li ka di gogo poul ka santi.”
Yé pa manti.
A pa mo ki di.
A répété mo ka répété.
Sa ki lé tandé, tandé…